Xhamia 'Hëna e re' në Kreuzlingen, Zvicër

Nxënësit e Shkollës së Mesme Pedagogjike vizitojnë xhaminë tonë

Më 18, 19 dhe 20 qershor 2008, për çdo ditë nga ora 8:00 - 9:00 të mëngjesit Bashkësinë tonë Islame "Hëna e re" në Kreuzlingen e vizituan nxënësit e Shkollës së Mesme Pedagogjike (Paedagogische Maturitaetsschule, www.pmstg.ch ) nga Kreuzlingeni. Ishin këta nxënësit e klasave 2 E (13 nxënës), 2 B (18 nxënës) dhe 2 A (19 nxënës) të udhëhequr nga Dr. Judith Borer, docente në Shkollën e Lartë Pedagogjike të Thurgaus (Paedagogische Hochschule Thurgau) në Kreuzlingen. Këta i priti imami i xhamisë sonë Rejhan Neziri dhe dy studentët tanë në ETH në Zürich, Irfan Ebibi dhe Zulkufli Imeri.

Kjo vizitë e tyre u zhvillua brenda programit të tyre mësimor mbi religjionin, me ç'rast nxënësit në fjalë patën mundësinë ta vëzhgojnë drejtpërdrejtë hapësirën e një xhamie apo faltoreje. Nga imami i xhamisë nxënësit patën mundësinë të mësojnë për pjesët përbërëse të xhamisë si mihrabi, kursija, minderi si dhe për shkrimet arabe që ndodhen në muret e xhamisë. Imami atyre u foli për funksionin e secilës pjesë si dhe ua sqaroi domethënien e shkrimeve arabe. Përmes video-beamerit imami u foli edhe për 6 parimet bazë të besimit islam si dhe për 5 shtyllat e Islamit e të ngjashme. Pas kësaj ekspozeje të shkurtër pasonte biseda e ndërsjellë mes nxënësve, udhëheqëses së nxënësve, imamit si dhe dy të rinjve tanë studentë me ç'rast sidomos nxënësit mysafirë parashtronin pyetje nga më të ndryshmet rreth Islamit si fe dhe traditës apo kulturës së muslimanëve gjetiu në botën islame e në Perëndim. Interesim të veçantë tregonin rreth temave që në një farë dore trajtohen me ngulm edhe nga mediat vendase, si: xhamitë, minareja, shamia, trajtimi i barabartë i femrës, martesat e përziera dhe martesat e dhunshme, pastaj besimi në librat dhe profetët e mëparshëm dhe relacioni me besimin krishter etj.

Një pjesë e bisedës kaloi edhe rreth web faqes së xhamisë sonë, për seksionin në gjuhën gjermane. Në fund atyre iu shpërnda edhe nga një fletushkë rreth historikut, qëllimit dhe aktiviteteve të Bashkësisë Islame Shqiptare "Hëna e re" në Kreuzlingen.

Më poshtë keni disa foto nga këto vizita: