Xhamia 'Hëna e re' në Kreuzlingen, Zvicër

Kushtet e përgjithshme të kontratës

Shkarkoni nga:

Kushtet e përgjithshme të kontratës për anëtarësim në Fondin për përgatitjen dhe transportimin e kufomave për në vendlindje.


A - Bazat dhe synimet:

Pika 1 - Kjo kontratë është përpiluar nga ana e kryesisë së xhamisë “Hëna e re” në Kreuzlingen duke u mbështetur në miratimin e dhënë për këtë nga ana e anëtarëve të xhamisë në mbledhjen e përgjithshme të mbajtur më 26 prill 2009.

Pika 2 - Anëtarët e këtij fondi si dhe anëtarët e ngushtë të familjeve të tyre përfitojnë nga ky fond me rastin e vdekjes së ndonjërit nga ata, me çka mëtohet të bëhet lehtësimi dhe tejkalimi më i pahetueshëm i kësaj situate.


B - Anëtarësimi:

Personat të cilët dëshirojnë të jenë të ndihmuar nga ky fond, duhet t’i përmbushin kërkesat vijuese:

Pika 3 - Gjatë regjistrimit në këtë fond për familje ose për person (varësisht cilës kategori i takon) duhet paguar shumën e paraparë të parave në llogarinë e Fondit. Për çdo familje duhet plotësuar formular të veçantë.

Pika 4 - Duhet pasur vendqëndrim zyrtar/legjitim në ZvicërNë rast të vdekjes së personave nga viset tona dhe që ndodhen si azilantë ose nëse konstatohet se kanë qenë në mënyrë ilegale në Zvicër, për këtë vendos kryesia e xhamisë.

Pika 5 - Kjo kontratë hyn në fuqi pasi të jetë mbushur, nënshkruar dhe dorëzuar formulari për regjistrim dhe pasi të jetë bërë pagesa e paraparë në llogarinë e Fondit. Nëse është dorëzuar formulari për regjistrim dhe pa u bërë pagesa ndodh ndonjë rast vdekjeje në atë familje, harxhimet nuk i merr përsipër Fondi.

Pika 6 – Çmimi për familje (shiko pikën 7) që është anëtare e rregullt e xhamisë kushton 50 Fr. për familje në vit; te familjet që nuk janë anëtare të xhamisë kjo shumë kushton 30 Fr. për person në vit; personat që nuk janë anëtarë të xhamisë dhe jetojnë vetë pa familje paguajnë 40 Fr. në vit. Anëtarët janë të obliguar që pagesën për vitet e ardhshme ta bëjnë në muajin e parë të vitit të mbushur. Shuma e pagesës mund të ndërrojë çdo vit sipas nevojës me lajmërim paraprak prej një muaji.


C - Kush ka të drejtë në këto shërbime?:

Pika 7 – Në këto shërbime të drejtë kanë personat vijues:

a) Të anëtarësuarit së bashku me fëmijët e tyre me qëndrim në Zvicër. Fëmijët e moshës 21 vjeçe dhe studentët deri në moshën 25 vjeçe (me kusht që të sjellin dëshmi nga shkolla) janë pjesë e familjes.

b) Fëmijët e martuar, qofshin edhe nën 21 vjeç, e humbin këtë të drejtë. Këta persona duhet rishtazi të anëtarësohen, duke filluar me formularin që duhet plotësuar për regjistrim në këtë Fond.

c) Fëmijët e vegjël ose foshnjat e lindura të vdekura ose të vdekura menjëherë pas lindjes, nëse familja dëshiron ato mund të varrosen edhe në varrezat publike të Zvicrës, sipas përvojës që kemi në Kreuzlingen. Nëse familja ka interesim që edhe të rriturin ta varrosë në Zvicër, Fondi i mbulon harxhimet normale me përjashtim të blerjes së vendit për varrim.

d) Ata të cilët vizitojnë të afërmit e tyre në Zvicër dhe banojnë te po këta persona, lejohet të anëtarësohen në Fondin tonë përmes tyre me një shumë të të hollave prej 250.- Fr. Këta persona e shfrytëzojnë këtë vetëm nëse vdesin në Zvicër. Kjo shumë paguhet vetëm një herë dhe vlen edhe për herët e vizitat tjera që mund t’i bëjë këtu.


D - Shërbimet :

Pika 8 - Nëse vdes në Zvicër ndonjëri prej anëtarëve të familjes së anëtarësuar, atëherë nga ana e këtij Fondi do të mbulohen këto shpenzime:

a) Shërbimet administrative në komunën gjegjëse dhe në ambasadën apo konsullatën e shtetit të cilit i takon kufoma (shpenzimet për autopsinë, morgun dhe njoftimit të vdekjes nuk janë të përfshira këtu).

b) Shpenzimet e përgatitjes së kufomës nga ana e imamit të xhamisë sonë (larja, mbështjellja me qefin dhe falja e namazit, nëse këtë e dëshiron familja),

c) Shpenzimet për tabutin (arkivolin), qefinin dhe produktet tjera për pastrim,

d) Shuma e të hollave për fluturim deri në aeroportin më të afërm ku do të varroset kufoma,

e) Bartja e kufomës nga aeroporti deri në vendin ku do të varroset kufoma bëhet me një makinë varrimesh. (Në rast se nuk do të mund të sigurohet kjo makinë, familjes së të vdekurit do t'u jepet një ndihmë e të hollave në shumë prej 200.- Fr.)

f) Në rast se personi i anëtarësuar vdes gjatë pushimit të tij në vendlindje, do të kompensohet vetëm bileta kthyese e klasës ekonomike e një personi të familjes së të vdekurit, me kusht që të dëshmohet certifikata e vdekjes dhe bileta e udhëtimit në origjinal.


E - Në rast vdekjeje:

Pika 9 - Me rastin e vdekjes së ndonjë personi të anëtarësuar, duhet që menjëherë të njoftohet ndonjëri nga personat në vijim: imami i xhamisë, kryetari i xhamisë ose anëtari i kryesisë i angazhuar për këtë Fond.

Sipas rregullave të Fondit, shpenzimet do të mbulohen vetëm nëse njoftimit dhe kërkesës do t’i bashkëngjiten dokumentet në vijim: a) Një kopje e librezës së anëtarësisë në këtë Fond, b) Dëshmia zyrtare për të vdekurin lëshuar nga mjeku apo spitali c) Pasaporta dhe letërnjoftimi zviceran (Ausweis) d) Certifikata martesore (nëse ka qenë i/e martuar).


F – Rregulla të ndryshme:

Pika 10 - Për ndryshimet e të dhënave personale të të anëtarësuarve si: datëlindja, kurorëzimi, shkurorëzimi apo ndërrimi i vendbanimit, duhet që me shkrim brenda 15 ditëve të informohet Fondi. Fondi nuk do të marrë asnjë përgjegjësi nëse nuk do të informohet me kohë dhe në mënyrë korrekte.

Pika 11 - Nëse shpenzimet e të vdekurit mbulohen nga ana e ndonjë sigurimi apo fondi tjetër, Fondi ynë anëtarëve të familjes së personit të vdekur do t’u ofrojë një shumë të të hollave e cila do jetë ¼ e shpenzimeve të bëra për një rast normal të cilin e realizon vetë Fondi.

Pika 12 - Për të anëtarësuarit të cilët vdesin në një vend të tretë, d.m.th: jo në Zvicër dhe jo në vendlindjet e tyre, atëherë do mbulohen vetëm ato shpenzime të cilat do të bëheshin në Zvicër, diferencën e të hollave tjera duhet ta mbulojë vetë familja.

Pika 13 - Me rastin e vdekjes së ndonjë personi të anëtarësuar lejohet që familja e po këtij personi vetëm pas 7 viteve të japë dorëheqje, përndryshe shpenzimet e bëra për të vdekurin e tyre do t’i kthehen Fondit.

Pika 14 - Dorëheqja nga ky Fond mund të bëhet vetëm me anën e një kërkese me shkrim dhe pagimit të anëtarësisë për atë vit. Kjo hyn në fuqi menjëherë sa të dorëzohet dorëheqja e nënshkruar. Anëtarësimi në ndonjë fond tjetër të këtij karakteri s’ka të bëjë asgjë me Fondin tonë.

Pika 15 - Në rast të ndonjë tërmeti ku mund të ketë një numër të madh të të vdekurve apo ndonjë fatkeqësie tjetër natyrore, parashihet që shuma e pagesës për transportin e kufomave të mos e tejkalojë shumën e përgjithshme të fondit të mbledhur për anëtarësim nga ana e po këtij Fondi.

Pika 16 – Çështjet tjera kontestuese që mund të lindin në mungesë të rregullave të parapara në këtë kontratë, do të zgjidhen nga ana e mbledhjes së përgjithshme (kuvendit të përgjithshëm) të xhamisë sonë.



Nëse pajtoheni me këto kushte, atëherë ju lutemi plotësojeni formularin për regjistrim dhe dërgojeni në adresën tonë ose plotësojeni formularin online duke klikuar këtu.

kthehuni lart