Xhamia 'Hëna e re' në Kreuzlingen, Zvicër

Njoftim i shkurtër rreth Fondit të xhenazes

Në mbledhjen e përgjithshme të rregullt që u mbajt më 26 prill 2009 në xhaminë tonë në Kreuzlingen të Zvicrës, ndër të tjera u vendos edhe për themelimin e një fondi të veçantë për kufoma, me çka do të lehtësohej situata e familjarëve të cilëve u ka ndodhur rasti i vdekjes.

Duke marrë shembull organizatat që qysh me kohë e bëjnë këtë organizim këtu në Zvicër dhe gjetiu nëpër Evropë, ne po e përcaktojmë formën dhe kushtet e këtij organizimi.

Shërbimet

Me këtë fond do të mbulohen këto shërbime:

1. Shërbimet administrative në komunën e të vdekurit si dhe shërbimet në ambasadë apo konsullatën të cilës i takon i vdekuri,

2. Shërbimet e përgatitjes fetare të kufomës nga ana e imamit të xhamisë sonë (larja, mbështjellja me qefin dhe namazi),

3. Blerja e tabutit (arkivolit) dhe pjesëve të tjera përcjellëse,

4. Shërbimet e transportit të kufomës nga vendi i përgatitjes (në spital ose varrezat zyrtare) deri në aeroportin e Zürichut, prej atje në aeroportin më të afërt të vendvarrimit të kufomës e deri te varrezat ku do të bëhet varrosja.


Anëtarësimi

Ne dallojmë dy forma të anëtarësimit, për çka edhe pasojnë çmime të ndryshme:

1. anëtarësimi përmes xhamisë
2. anëtarësimi privat


Çmimet

1. Anëtarësimi përmes xhamisë (për anëtarët e rregullt të xhamisë) bëhet në bazë familjare dhe paguajnë për mbarë familjen (babain, nënën dhe fëmijët deri në 21 vjeç – studentët deri në 25 vjeç): 50 Fr. në vit për familje

2. Anëtarësimi privat vlen për personat që nuk janë anëtarë xhamie, por të cilët duan të përfitojnë nga fondi i xhenazes.

Për këta ka dy mundësi:

1. Nëse jetojnë me familje: 30 Fr. në vit për secilin person veç e veç
2. Nëse jetojnë vetë: 40 Fr. në vit për secilin person veç e veç



Për hollësi të tjera, ju lutemi lexojini Kushtet e përgjithshme të kontratës së këtij Fondi.