Xhamia 'Hëna e re' në Kreuzlingen, Zvicër

Themelimi i Forumit Rinor Islam në Kreuzlingen dhe rrethinë

Pas një ftese paraprake që iu bë të rinjve muslimanë të Kreuzlingenit dhe rrethinës, përfundimisht më 17. 02. 2007 në praninë e 22 të rinjve, kryetarit dhe imamit të xhamisë, u themelua Forumi Rinor Islam në Kreuzlingen dhe rrethinë.

Takimin e udhëhoqi kryetari i xhamisë z. Faredin Xhaferi i cili pasi i uroi të rinjtë prezentë për interesimin e tyre treguar ndaj Islamit dhe xhamisë së Kreuzlingenit, i njoftoi ata me procedurën e rrjedhjes së takimit.

Më pas ia dha fjalën imamit të xhamisë mr. Rejhan ef. Nezirit, i cili pasi e falënderoi Zotin dhe pasi shprehu mirënjohje për interesimin e këtyre të rinjve rreth themelimit të një forumi të këtillë, ndër të tjera u shpreh: "Ky forum ose kjo shoqatë do të jetë organ i Bashkësisë Islame Shqiptare "Hëna e re" në Kreuzlingen dhe do të veprojë në bazë të parimeve dhe frymës së përgjithshme të saj. Ai nuk do të jetë i pavarur porse do ta njohë për të vetin edhe statutin e kësaj Bashkësie Islame dhe në bazë të tij do të përpilojë edhe statutin e vet më të veçantë, ku do t'i shtrojë qëllimet dhe formën më të qartë të organizimit e të veprimtarisë së saj.

Anëtarë të këtij forumi mund të bëhen të gjithë të rinjtë myulimanë që jetojnë në Kreuzlingen dhe rrethinë. Të mirëseardhur do të jenë edhe ata nga qytetet tjera, edhe pse ne preferojmë që ata të anëtarësohen në forumin rinor islam më të afërt që e kanë. Këta anëtarë mund të jenë me përkatësi kombëtare të ndryshme, mjafton që ata këtë forum ta ndiejnë për të vetin...

Anëtarë të kryesisë së këtij forumi duhet të jenë personat që do të mund të shërbejnë si model pozitiv islam për të rinjtë tjerë, ata është mirë ta njohin sadopak Islamin dhe leximin e Kur'anit në gjuhën arabe, duhet të jenë komunikues të mirë me njerëz, do të jenë të medh'hebit (shkollës juridike) hanefijj si dhe kritere të tjera pozitive që duhet t'i kenë ata...

Qëllimi i krijimit të një forumi të këtillë është që ta organizojë më mirë jetën dhe veprimtarinë e të rinjve muslimanë në këtë rreth, që këta të rinj ta mësojnë më mirë Islamin dhe kulturën si dhe bagazhin e madh të tij. Të njëjtën pastaj ta përcjellin te të rinjtë tjerë muslimanë që kanë probleme të ndryshme jetësore e shpirtërore, të bashkëpunojnë me xhaminë amë në Kreuzlingen si dhe me xhamitë tjera të rajonit, t'i respektojë nëpunësit fetarë, kryesitë dhe organet përcjellëse të atyre xhamive, t'i respektojë e të bashkëpunojë me Lidhjet e Bashkësive Islame në Zvicër si DIGO etj., të krijojë marrëdhënie të mira me forumet e ngjashme në rajon, të merret me aktivitete të ndryshme fetare, kulturore, sportive etj., të respektojnë ligjet e vendit dhe të kontribuojnë në rruajtjen e rendit dhe të qetësisë së qytetarëve, t'i ikin ndikimit të rrymave e organizatave radikale, fanatike e joproduktive për jetën fetare të muslimanëve që jetojnë në Zvicër..."

Më pas e morën fjalën edhe disa të rinj, të cilët dhanë sugjerimet e tyre se si do të dukej ky Forum dhe çfarë aktivitetesh do të duhej të ndarëmarrë ai në të ardhmen.

Kryetari Xhaferi më pas u tha të pranishmëve se "ju që jeni sonte këtu jeni edhe themeluesit e parë të këtij forumi" dhe u sugjeroi atyre ta zgjedhin kryesinë e forumit që do të ishte mirë të përbëhej prej 7 (shtatë) anëtarëve: kryetarit, nënkryetarit, sekretarit, arkëtarit etj., çka edhe u bë.

Pas kandidimit të anëtarëve të kryesisë dhe pas votimit të hapur, u zgjodh kryesia e këtij Forumi si vijon:

1. Kryetar - Elgadaf Aziri
2. Nënkryetar - Lulzim Bilalli
3. Sekretar - Rami Alili
4. Zv. sekretar - Muhamet Selmani
5. Arkëtar - Afrim Beluli
6. Zv. arkëtar - Basri Kurtishi
7. Përgjegjës biblioteke - Rejhan Memeti

Pas urimit të kryetari dhe imamit të xhamisë për postet dhe për angazhimin serioz të tyre në këtë drejtim, i sugjeruan Forumit që sa më shpejt që të jetë e mundur të fillonin më përgatitjet për hartimin e Statutit të tyre dhe planifikimit të aktiviteteve që duhet të ndërmerren në të ardhmen.




Kliko këtu për ta vizituar web faqen e Forumit të të Rinjve Muslimanë në Kreuzlingen .