EL - HIKMEH

Sali Shasivari

Thirrja islame

Ditëve të fundit, anekand Britanisë së Madhe, nën organizim të Akademisë Islame për Edukim dhe Gjurmime (Islamic Education and Research Academy) 1, po qarkullon një turne nën moton: Periudhë e re në da've (thirrje islame); "Thirrja e njerëzimit për kthim tek Allahu", e që pata rastin ta ndjek një nga panelet e tij që u mbajt në një nga xhamitë e Mançesterit.

Nuk është hera e parë që po prezentoj në një panel në lidhje me da'ven (thirrjen islame), madje shumica prej lexuesve ka parasyshë aspektet dhe rëndësinë që ka thirrja islame në përgjithësi; mirëpo, paneli në fjalë ishte i veçantë, edhe atë për arsyet që vijojnë:

1. Vendmbajtja: Në një shtet me pakicë muslimane (Britani).
2. Objekti: Në një nga xhamitë e Mançesterit, gjegjësisht xhamia e Didsbjurit (Didsbury Mosque), objekti i së cilës dikur     ka qenë kishë.
3. Prezentët: Një xhemat që përbëhej thuajase nga të gjitha racat dhe nacionalitetet e botës, në mesin e të cilëve shumë     të konvertuar në Islam.
4. Udhëheqësi i panelit: Hamza Andreas Tzortzis 2, me origjinë greke, i konvertuar në Islam, dhe i cili jeton në Britaninë e     Madhe.
5. Panelistët:

- Jusuf Estes (Yusuf Estes), nga Teksasi i SHBA-ve, i cili e kishte pranuar Islamin duke u munduar ta konvertojë një     musliman në krishterizëm 3.
- Husejn Jii (Hussain Yee), ish-budist nga Malajzia, me origjinë kineze,
- Omer Veston (Omar Weston), me origjinë britaneze, i cili jeton në Meksikë,
- Abdurrahim Griin (Abdurraheem Green), nga Britania e Madhe.

Për panelin në fjalë ishte paralajmëruar poashtu prezenca e:

- Jahja Sakuillo (Yahya Saquillo), nga Ekuadori,
- Jusuf Çambers (Yusuf Chambers), nga Britania e Madhe,
- Isa Garsia (Isa Garcia), nga Kollumbia dhe
- Dr. Bilal Filips (Dr. Bilal Philips), nga Kanada,

mirëpo për shkaqe objektive, këta të fundit nuk mundën të prezentojnë.

Vlen të përmendet fakti se gjithë të lartëpërmendurit janë persona të konvertuar në Islam dhe se shumica prej tyre janë personalitete të njohura në sferën e da'ves (thirrjes islame).

Vetë aspektet e lartëpërmendura të bëjnë të kuptosh se bëhet fjalë vërtetë për një periudhë të re në thirrjen islame.

Qëllimi i panelit në fjalë si dhe turneut në përgjithësi, ashtu siç shpjegoi organizatori i kësaj nisiative, Abdurrahim Griin (Abdurraheem Green), ishte grumbullimi i fondeve për themelimin e një lëvizje të gjithmbarshme të thirrjes islame. Në mes tjerash, z. Griin përmendi rëndësinë e themelimit të një lëvizje të këtillë në nivel mbarëbotëror, lëvizje kjo e cila do të veprojë në mënyrë institucionale dhe të koordinuar. Madje, ai përmendi se për një nisiativë të këtillë ishte motivuar nga faktet që vijojnë:

• Një lëvizje misionare krishtere me emrin Campus Crusade for Christ 4 ka arritur të rekrutojë 25,000 misionarë të trajnuar mirë dhe me pagesë të plotë si dhe 250,000 vullnetarë të trajnuar; madje, lëvizja në fjalë, vetëm vitin e kaluar kishte arritur të tubojë një buxhet prej 650 milionë dollarëve amerikanë.
• Kjo, përreth qindra organizatave tjera misionare të cilat veprojnë anekand botës.
• Bota krishtere shpenzon të holla për qëllime misionare më shumë se për çdo gjë tjetër, si p.sh. për ndihmë ndaj të varfërve.
• Një misionar krishter kishte studjuar plotë 30 vite një gjuhë të cilën e flasin 18 persona, me qëllim të përkthimit të Biblës në atë gjuhë!

Kur merren parasyshë këto dhe shumë fakte të tjera, si dhe mungesa e një lëvizje të mirëfilltë mbarëbotërore për thirrje islame, shtoi z. Griin, atëherë e kuptojmë rëndësinë e themelimit të lëvizjes mbarëbotërore për thirrje, sidomos kur kemi parasyshë fjalët e Allahut të Madhërishëm në Kur'anin famëlartë:

"Ju jeni populli më i dobishëm, i ardhur për të mirën e njerëzve, të urdhëroni për mirë, të ndaloni nga veprat e këqija dhe të besoni në All-llahun. ...". (Ali Imran: 110)

"Ne dërguam në çdo popull të dërguar që t'u thonë: "Adhuroni vetëm All-llahun, e largojuni djajve (adhurimit të tyre)!"...". (En-Nahl: 36)

"Ti (Muhammed) thirr për në rrugën e Zotit tënd me urtësi e këshillë të mirë dhe polemizo me ata (kundërshtarët) me atë mënyrë që është më e mira. ...". (En-Nahl: 125)

"Thuaj: "Kjo është rruga ime, e vënë në fakte të qarta, e që unë thërras te All-llahu, unë dhe ai që vjen pas meje. Larg të metave është All-llahu, e unë nuk jam nga idhujtarët"". (Jusuf: 108)

"Nga ju le të jetë një grup që thërret në atë që është e dobishme, urdhëron për punë të mbara dhe ndalon nga e keqja. Të tillët janë ata të shpëtuarit". (Ali Imran: 104)

"E kush është në rrugë më të mirë se ai që thërret në rrugën e All-llahut, që bën vepra të mira dhe që thotë: "Unë jam prej muslimanëve?". (Fussilet: 33)

"Pasha kohën! Nuk ka dyshim se njeriu është në një humbje të sigurt. Me përjashtim të atyre që besuan, që bënë vepra të mira, që porositën njëri-tjetrin t'i përmbahen të vërtetës dhe që këshilluan njëri-tjetrin të jenë të durueshëm". (El-Asr: 1-3)

Poashtu, Pejgamberi (sal-lallahu alejhi ve sel-lem) ka thënë:

"Nëse ndonjëri prej juve vëren ndonjë vepër të keqe, ai duhet ta ndryshojë atë me duart e tij, nëse nuk mundet, atëherë duhet ta ndryshojë atë përmes gojës së tij, e nëse nuk mundet, atëherë duhet së paku ta urrejë atë me zemrën e tij, e një gjë e këtillë është forma më e dobët e besimit". (Transmeton Muslimi)

"Ju duhet patjetër të urdhëroni në të mirë dhe të ndaloni nga e keqja, përndryshe, Allahu do të sjell mbi ju fatkeqësi, me ç'rast ju do të luteni (do të bëni dua'), mirëpo lutja (duaja) juaj nuk do të pranohet".

"Kushdo që inkurajon ndonjë person që të bëjë një punë të mirë, ata do të fitojnë shpërblimet për atë person i cili vepron atë punë të mirë, pa mos e pakësuar shpërblimin e atij personi".

Nën dritën e këtyre ajeteve Kur'anore si dhe haditheve të Pejgamberit (sal-lallahu alejhi ve sel-lem) dolën edhe konkluzat e panelit, në mesin e të cilave veçojmë:


Obligimi i thirrjes:

• Thirrja jonë ndaj njerëzimit nuk qëndron në ftesën e tyre për t'u konvertuar, por për t'u kthyer prapa tek origjinalja; e ajo është besimi në Allahun Fuqiplotë dhe ndjekja e rrugës së tij.
• Ne jemi të obliguar që të thirrim, e jo të udhëzojmë në Islam, pasi udhëzimi i takon Allahut Fuqiplotë.
• Një nga shkaqet kryesore të fatkeqësive të njëpasnjëshme që po e godasin ummetin Islam si dhe mbarë njerëzimin në ditët e sotme është lënia pasdore e obligimit hyjnor të thirrjes në të mirë dhe ndalimit nga e keqja.
• Thirrja në të mirë dhe ndalesa nga e keqja nuk është obligim që bie vetëm mbi supet e imamëve dhe dijetarëve, por secili musliman e ka për obligim që të thirr në rrugën e Allahut, në suaza të kapacitetit, mundësive dhe rrethanave të tij.
• Thirrësi nuk është e domosdoshme që të jetë dijetar, mirëpo, së paku duhet të dijë se çka flet, ose të konsultojë dikend që din.

Metodat e thirrjes:

• Thirrja me urtësi dhe këshillë të mirë.
• Thirrja përmes kontaktit direkt.
• Thirrja përmes shembëlltyrës, sjelljes, karakterit dhe moralit të mirë.

Gabimet gjatë thirrjes:

• Thirrja me vrazhdësi dhe fanatizëm.
• Thirrja e tjerëve për t'iu bashkangjitur një sekti apo grupacioni të caktuar.
• Thirrja në një nga aspektet e Islamit, duke i lënë anash aspektet tjera.
• Kur veprat e thirrësit janë në kundërshtim me atë në të cilën thërret.

Nevojat kryesore të thirrjes islame në ditët e sotme:

• Resurset njerëzore
• Resurset materiale

Pse duhet thirrur në Islam?

Shkaqet se pse jemi të obliguar të thirrim në Islam janë si vijojnë:

• Thirrja në të mirë dhe ndalesa nga e keqja është obligim i çdo muslimani nga ana e Allahut xh.sh.
• Nëse ne nuk e kryejmë një obligim të këtillë, a thua vallë kush do ta kryejë?
• Në qoftë se nuk e kryejmë një obligim të këtillë, do ta humbim njerëzimin.

Husejn Jii (Hussain Yee), në qasjen e tij me titull "Islami do të hyjë në çdo shtëpi", përmendi se ne si muslimanë deri tash kemi dështuar në thirrjen e njerëzimit në Islam. Në pyetjen e tij drejtuar prezentëve në lidhje me atë se 'cili prej jush është orvatur së paku një herë në jetën e tij që ta thirr dikend në Islam?', numri i atyre që u përgjigjën pozitivisht mundej të numrohet në gishta. Madje, ai theksoi rëndësinë e përdorimit të mjeteve bashkëkohore, siç janë mjetet e ndryshme të komunikimit, në përcjelljen e mesazhit Islam tek të tjerët. Fjalimin e tij e përmbylli me porosinë: "Secili prej neve e ka për obligim që gjatë ditës të bejë da've (thirrje) ndërsa gjatë natës të bëjë dua' (lutje)".

Mëpastaj, panelistët ndanë me prezentët disa momente të rrugëtimit të tyre në Islam, rrugëtim ky i cili ishte i mbushur përplotë me sfida dhe momente emocionale dhe interesante.

Ndërsa kulminacioni i mbrëmjes qe në konvertimin e një vajze që ishte prezente në xhami, ndodhi kjo e cila në ditët e sotme nuk është e rrallë për Islamin, si fe që përhapet më me shpejtësi në Botë, duke e vërtetuar kështu thënien e Pejgamberit (sal-lallahu alejhi ve sel-lem):

"Kjo çështje (Islami) do të përhapet gjersa të arrijë në të gjitha vendet në të cilat arrin dita dhe nata...". (Musnedi i Imam Ahmedit)

Ajo që na mbetet neve është të pyesim vetveten: A thua vallë sa kontribuam dhe ndihmuam karvanin e thirrjes islame?!

____________________

1 www.iera.org.uk
2 Më gjërësisht në lidhje me aktivitetet e tij: http://hamzatzortzis.com
3 Lexo ngjarjen e plotë të konvertimit të tij në: www.famousmuslims.com
4 www.ccci.org

shko lart