EL - HIKMEH

Loja me zjarrin
Sali Shasivari

Që prej pavarësimit të Maqedonisë e deri më tani, e gjithë kjo periudhë dydekadëshe e ekzistimin të saj si shtet i pavarur dhe i brishtë është karakterizuar me shumë turbullira dhe “befasi”, dhe se gjëja e vetme konstante me të cilën mund të karakterizohet ky shtet është se ai po vazhdon të ec krye në veti dhe në drejtim të kundërt të akrepave të kohës!

Maqedonia është shtet i vetëm i llojit të vet i cili dëshiron të krijojë shoqëri multietnike në baza të ultranacionalizmit; shtet multireligjioz në baza të ultraortodoksizmit; shtet demokratik në baza të totalitarizmit; shtet të së drejtës në baza të diskriminimit; shtet ligjor në baza policore; shtet të integruar në baza të dezintegrimit; etj. Kështu, rasti i qasjes ndaj çështjeve të caktuara, siç janë: gjuha shqipe dhe statusi i saj, rasti i përndjekjeve dhe burgosjeve të ndryshme, qasja selektive ndaj objekteve dhe komuniteteve fetare, rrahja e popullatës shqiptare në çdo kohë dhe në çdo vend…etj., janë vetëm disa nga shembujt e sjelljeve “devijante” të këtij shteti i cili hiqet si i civilizuar dhe demokratik, dhe të cilit i pëlqen që sa herë që i zbulohen pjesët e tij të turpshme, t’i mbulojë me flamurin blu të integrimeve euro-atlantike të cilin e pretendon.

Një zullum i këtillë në këtë shtet rritet edhe më shumë sa herë që vijnë në pushtet ata të cilët jo vetëm që pretendojnë të jenë “populli i zgjedhur nga ana e Zotit” për të udhëhequr me këto vise, por apetitet dhe fantazmat e tyre marrin përmasa dramatike, të cilat në pamundësi që të bëhen reale, shndërrohen në filma dhe klipe të llojit trillim historik! Madje, histeria e tyre manifestohet në mbjelljen e flamujve, skulpturave, kryqeve dhe kishave në çdo pëllëmbë të tokës.

Përreth shumë rekomandimeve të miqve të afërt dhe të largët, të cilët mundohen ta mbajnë gjallë këtë shtet përmes infuzioneve, se shpëtimi i vetëm i tij qëndron në krijimin e një shoqërie multietnike dhe multireligjioze, shoqëri kjo e cila do të kultivojë vlerat e respektit, tolerancës dhe bashkëjetesës, të gjitha këto thirrje po hasin në veshë të shurdhër dhe se qeveria aktuale vazhdon politikën e saj populiste në llogari të shqiptarëve, çdo herë nën moton “sa më antishqiptar që je aq më maqedonas i mirë je”!

Paradoksi më i madh qëndron pikërisht në faktin se ky shtet nuk po i pranon pikërisht thirrjet e atyre të cilët ishin ideatorët kryesorë të nacionalizmit, e praktikuan atë dhe më në fund ia panë sherrin, andaj edhe ju sugjerojnë të pasprovuarve që mos luajnë me “zjarrin”.

Thirrja e këtillë nga ana e perendimorëve sa vjen dhe e shton kryeneçësinë e politikbërësve maqedonas, të cilët, si zakonisht, kanë ditur dhe vazhdojnë të aktrojnë rolin e sakrificës, duke bërë satanizimin e vazhdueshëm të shqiptarëve. Ndërsa, pala shqiptare, si zakonisht, prehjen e gjen në thurrjen e ëndërrave për një ardhmëri më të mirë.

Nën hijen e këtij realiteti të hidhur, ata të cilët po pësojnë janë pikërisht popullata shqiptare, e cila zihet e piqet me hallet e veta si dhe hallet të cilat ia shkaktojnë ata të cilët as nuk e mëshirojnë, e as që lejojnë që mëshira e Zotit të zbrez mbi ta, e ata janë të zgjedhurit e tyre, para se të jenë të tjerët.

Me sa duket, kjo popullatë e përvuajtur do të vazhdojë të malltretohet dhe persekutohet, sikurse dikur në komunizëm, sot një gjë e këtillë po ndodh në demokraci, dhe se dallimi i vetëm është se dikur shqiptarët rriheshin në qelitë e burgjeve dhe qendrave të persekutimit, ndërsa sot, ata rrihen para syve të fëmijëve të tyre si dhe në prezencë të policisë dhe mediave, gjersa politikanët e tyre shikojnë “sehir”.

Ky zjarr i nacionalizmit, të cilit po i fryn Gruevski dhe vasalët e tij nuk është gjithaq brengosës, pasi, s’do mend se para së gjithash do të djeg ata që po i fryejnë atij, por ajo që të irriton më tepër është pikërisht qëndrimi i politikanëve tanë shqipfolës të cilët “as çahen e as digjen”, madje, siç thotë populli, nuk janë “as hajri i taurkit e as sherri i shkavit”.

Mirëpo, politikanët shqiptarë duhet të jenë të vetëdijshëm se nama dhe dënimi i popullit të cilin e përfaqësojnë djeg më shumë se vet zjarri, andaj, kujdes!