EL - HIKMEH

Lajmërimi ‘famoz’

Ditëve të fundit studentëve, po edhe të tjerëve në Tetovë vëmendjen po ua tërheqin lajmërimet e shumta të vëna nëpër lokale të ndryshme, shtylla të rrymës elektrike, bilborde e të ngjashme. Por jo vetëm kaq, lajmërimet e tilla i gjen edhe nëpër mure dhe hyrje-dalje të Universitetit (USHT-së).

Mirëfilli dihet se studentët janë shtresë e përzgjedhur e shoqërisë. Ata janë rinia me të gjitha kuptimet që përmbajnë fjalët entuziazëm, iniciativë, gjallëri, vullnet, risi, voluntarizëm por njëkohësisht edhe shpresë e së ardhmes. Nga ana tjetër, universiteti është një shoqëri e hapur ku studentët mësojnë dhe praktikojnë disa parime, si: liria, mënyra e marrjes së vendimeve duke u konsultuar, demokracia, dialogu, respektimi i mendimit të të tjerëve, atdhetaria, përgjegjësia, shpresa e së ardhmes, marrja përsipër e aspiratave të popullit e kështu me radhë.

Ditëve të fundit studentëve, po edhe të tjerëve, vëmendjen po ua tërheqin lajmërimet e shumta të vëna nëpër lokale të ndryshme, shtylla të rrymës elektrike, bilborde e të ngjashme. Por jo vetëm kaq, lajmërimet e tilla i gjen edhe nëpër mure dhe hyrje-dalje të universitetit.

Nga kureshtja, për shkak të pompozitetit që i jepet këtij lajmërimi, afrohesh që të shohësh në çfarë të fton i njëjti, jo nga ajo se ka dizajnin shumë të bukur, por nga ajo se e sheh edhe logon e Unionit të Studenteve aty. Kur afrohesh ta lexosh, zhgënjehesh i tëri, dhe me vete thuash: sa të mjerë që jemi! ( Kliko këtu për ta shikuar pankartën)

Unioni i studentëve është organ në të cilin duhet inkorporuar studentë të cilët janë të aftë, kanë ide dhe vizion, të cilët do të merren me 'hallet' e studentëve, por edhe duhet të zgjidhen nga të njëjtit, duke iu ofruar atyre platformë e program konkret. Në vendin tonë nuk kemi zgjedhje por... Kur e përmendi këtë nuk e kam fjalën vetëm për garniturën aktuale, mirëpo edhe atë paraprake, të paktën 'unione' nga të cilat kemi 'shijuar fryte' edhe ne si gjeneratë. Fjala nxjerr fjalën, mirëpo për këto ndoshta ndonjë radhë tjetër. Kësaj here 'lajmërimi famoz'.

Në vend që unionet tona të merren e të kujdesen për nevojat dhe kërkesat e studentëve, të organizojnë ndonjë tribunë shkencore, tryezë të rrumbullakët, e pse jo edhe ndonjë aktivitet sportiv, unionet tona të vetmet organizime që mund t'i bëjnë janë brucoshiadat dhe absolventiadat deri tash të dëgjuara. Ndërsa tash, aktivitetet e tyre zgjerohen edhe në mbrëmje ku parashihet një numër më i madh i pjesëmarrësve. Kur e them këtë kam parasysh dy arsye; evenimenti i tillë organizohet në sallë sportive, hapësirë shumë më e madhe sepse do kenë mundësi të pranishmit të ndjekin një koncert me 'yjet e estradës', dhe ajo më kryesorja se do të zgjidhet edhe 'bukuroshja' e natës.

Ne harrojmë se duhet kushtuar më tepër rëndësi zgjedhjes së studentes më të mirë për nga suksesi, mirëpo na kujtohet të zgjedhim për nga bukuria; jo rastësisht jemi në këtë gjendje që jemi!

?shtë koha që të vetëdijesohemi të gjithë, se jo të gjithë mund të bëhen prijës të një kategorie shoqërore. Kultura e një udhëheqësi nuk përfshin vetëm mënyrën e zgjedhjes së karakterit të një organizimi, por edhe zgjedhjen e ndërmarrjeve të cilat janë ndihmës të një aktiviteti. Nga ana tjetër duket ndoshta punë e vogël se ku ngjitet një lajmërim i tillë, mirëpo edhe kjo flet shumë përpos për Unionin e studentëve, edhe për imazhin e universitetit.

Derisa je duke mbaruar një fakultet, qëndrimi në një union të studentëve është aq i 'dobishëm', saqë me të mbaruar fakultetin, përpos që do jesh 'i kërkuar' në profesionin tënd, ekziston mundësia që të ftohesh e të organizosh 'gala mbrëmjet' edhe nëpër shtëpi të modës anekënd!

Studenti ka një kohë relativisht të lirë që duhet të mbushet me gjëra të dobishme, duke organizuar aktivitete në fusha të ndryshme, që bëjnë të mundur që të përfshijnë energjitë e rinisë, me qëllim të mbrojtjes nga degjenerimi, droga dhe devijimet e tjera, e jo me organizime të këtilla banale dhe të padobishme.

Ashtu siç u jep shoqëria bijve të saj - student, çdo gjë që ka, po ashtu edhe studentët duhet t'i japin shoqërisë së tyre përmbledhjen e ideve të tyre, të mendjes e të dijes, në mënyrë që të ndihmojnë në përparimin e shoqërisë dhe ajo të krenohet me ta.

Rinia në çdo popull është pararoja e aftë për të bërë ndryshime në çdo fushë të jetës. Mirëpo tek ne funksionon ndryshe, ata të cilët kanë mundësi të kontribuojnë për të mirën e përgjithshme nuk involvohen, apo nuk iu jepet mundësia, ndërsa ata të cilët kyçen, nuk merren me organizime konstruktive, por me të tilla sikurse ky aktivitet destruktiv.

Unioni i studentëve, apo i ashtuquajturi Parlament studentor, duhet që të jetë "therrë" në kuptimin pozitiv, duke mos i lënë të qetë profesorët, me ftesa për debate, takime me studentë, këmbime përvojash dhe të ngjashme.

Nuk duhet pretenduar se ata të cilët ishin më parë ishin më të mirë, mirëpo vazhdimësia e këtyre të rinjve duhet dëshmuar ndryshe!

Meqë kemi dy opsione për të njëjtën natë, zgjedhja na takon neve, të shohim studentët më të suksesshëm të vitit të organizuar nga një organizatë joqeveritare apo të shkojmë ta zgjedhim më të bukurën, organizuar nga një Union Studentor.

Mendoj se, studentët të cilët promovojnë, plasojnë dhe miratojnë aktivitete të tilla dhe propagandojnë edhe me logo të Parlamentit studentor, së bashku me sponsor siç është Birraria, ndëshkimin duhet marrë nga udhëheqësia e këtij institucioni, me qëllim që studentët të cilët do jenë prijës të këtyre organeve në të ardhmen të jenë më të vëmendshëm.
Dhëntë Zoti që në revistën e Universitetit, në faqen e ashtuquajtur të 'posterave' të kemi studentët e dekoruar si më të suksesshëm, e jo studenten më të bukur!

Autori është Psikolog i diplomuar, vazhdon studimet postdiplomike në lëminë e Psikologjisë arsimore, USHT.