EL - HIKMEH

Komisioni Zviceran kundër Racizmit kërkon pranimin e muslimanëve

Muslimanët po diskriminohen në jetën e përditshme. Komisioni Zviceran kundër Racizmit (Die Eidgeno"ssische Kommission gegen Rassismus [EKR]) këshillon se si mund të çrrënjosen trajtimet e pabarabarta dhe të zhduken paragjykimet lidhur me përkatësinë fetare.

Në një letër të prezantuar të premten (01.09.2006) në Bernë, Komisioni Zviceran kundër Racizmit (ERK) u drejtohet autoriteteve shtetërore, kantonale e komunale, partnerëve socialë, mësuesve e profesorëve si dhe mediave. Qëllimi i kësaj është nevoja për bashkëjetesën me muslimanët në kuptim të kampanjës aktuale rinore të Këshillit Evropian „Të gjithë ndryshe - të gjithë njësoj“.

Numri i muslimanëve që sot jetojnë në Zvicër që nga viti 1970 është njëzetëfishuar në 340’000. Afro 12 % prej tyre janë shtetas të Zvicrës. Vetëm 10 deri 15 % prej tyre e praktikojnë besimin e tyre. Për shumicën dërmuese feja nuk është e rrënjosur në jetën e tyre të përditshme, ndërsa për të rinjtë ajo paraqet një traditë familjare.

Përkundër kësaj, para së gjithash muslimanët po definohen sipas përkatësisë së tyre fetare, tha nënkryetarja e ERK-së Boël Sambuc. Në debatet publike ekziston tendenca që muslimanët në mënyrë kolektive t’i fajësojnë e t’i konsiderojnë për dash kurbani për ngjarjet që ndodhin në botë dhe t’i fusin ata nën „dyshimin e përgjithshëm terrorist“. Prandaj, diskursi politik ndaj muslimanëve është i kushtëzuar nga stereotipet dhe paragjykimet.

ERK-ja ka konstatuar diskriminime direkte ose indirekte në jetën e përditshme, kur po refuzohen kërkesat e ndërtimit të minareve edhe pse rregullimi i zonave e lejon këtë, ose kur një varrim i përshtatshëm në varrezat publike u mundësohet vetëm pjesëtarëve të feve shumicë.

Si diskriminime po ashtu mund të vlerësohen edhe rastet kur përkatësia fetare luan rol gjatë punësimit ose pushimit nga puna; gjatë marrjes në pyetje për dhënien e shtetësisë; në jetën shoqërore; po madje edhe kur ato nuk kanë kurfarë kuptimi të veçantë. Për shkak të shamisë (mbulesës) femrat muslimane e humbin vendin e punës ose edhe s’e fitojnë dot qysh në fillim.

ERK-ja u apelon autoriteteve që t’i përmbahen parimit të lirisë fetare dhe ndalimit të diskriminimit të shprehur në kushtetutë dhe në marrëveshjet ndërkombëtare për mbrojtjen e të drejtave të njeriut. Diskriminimet duhen kundërshtuar në mënyrë më aktive. Lufta kundër terrorizmit nuk guxon të çojë në identifikimin e muslimanëve me terroristët.


Burimi: sda, 01.09.2006
Nga gjermanishtja: mr. Rejhan Neziri

Kthehu lart