EL - HIKMEH

Sali Shasivari

Kujt po i pengon shamia?

(Shkas: Tentimi për largimin e nxënëses së mbuluar nga Shkolla e Mesme Ekonomike "8 Shtatori" në Tetovë)

Nuk është hera e parë që një pseudo-arsimtar apo pseudo-drejtor në shoqërinë shqiptare të trevave tona në tranzicion merr guximin që të provokojë, diskriminojë, nënçmojë, kanos apo përjashtojë ndonjë nxënëse nga kolektivi që e përfaqëson, duke u thirrur herë në ndonjë të ashtuquajtur "rregullore interne" të shkollës që e përfaqëson, herë në emër të "patriotizmit" dhe "ideve përparimtare", e herë në emër të "emancipimit" dhe nevojës së "evropeizimit" të shoqërisë sonë shqiptare!

Fjala "rregullore interne" të përkujton "rregulloret interne" famëkeqe nëpër institucionet e ndryshme gjatë kohës së ish-sistemit i cili na thithi gjakun përgjatë gjysmë shekulli, rregullore këto të cilat vlenin vetëm për palën shqiptare, dhe të cilat, për fat të keq, realizoheshin nga vetë shqiptarët. Bile-bile, disa shqipfolës bënin gara në mes veti se cili do t'i përmbahet më në përpikshmëri "rregullores" në fjalë, duke shpresuar në ndonjë metelik më tepër, ndonjë privilegj më të mirë, apo së paku "nderin" e të qenurit komunist shembullor!

Kështu, dje, ishin mësuesit dhe drejtorët komunistë shqiptarë ata të cilët detyronin nxënësit që agjërojnë ta prishin agjërimin, apo dënonin nxënësin/en për ndjekjen e mektebit, duke u shkaktuar telashe edhe prindërve të tij/saj...! Madje, ishin disa shqipfolës ata të cilët nxitën dhe realizuan vendimet e Partisë Komuniste të asaj kohe për heqjen e 'havales', prishjen e mureve dhe shkurtimin e dyerve të shqiptarëve...

Ndërsa sot, janë disa arsimtarë apo drejtorë "demokratë" shqiptarë të cilët marrin guximin të përjashtojnë nga ora e mësimit, po bile edhe nga shkolla, ndonjë nxënëse të sjellshme dhe të suksesshme për shkak se është e veshur konform bindjes së saj fetare...

'Sa shumë i ngjanë e sotmja të djeshmes', thotë populli.

Në qoftë se "rregullorja interne" e SH.M. Ekonomike në fjalë me të vërtetë ngërthen në vete ndalimin e vijimit të mësimit nga nxënëset e mbuluara, shtrohet pyetja: kush janë ata të cilët e kanë formuluar një rregullore të këtillë kaq "famoze", e cila përreth faktit që nuk është 'shkrim i shenjtë', ajo është tejet skandaloze, pasi bie në kundërshtim me çdo normë, qoftë ajo njerëzore, kombëtare, fetare, e në veçanti me frymën kushtetuese të Maqedonisë (sidomos Neni 19 i Kushtetutës së RM-së, ku garantohet liria e besimit fetar si dhe shprehja e lirë dhe publike e fesë) si dhe me liritë dhe të drejtat themelore të njeriut të garantuara me ligj ndërkombëtar (siç është Neni 18 i Deklaratës Universale të të Drejtave të Njeriut që ka të bëjë me 'të drejtën e manifestimit të bindjes fetare në praktikë'; si dhe Neni 26 i të njëjtës Deklaratë që ka të bëjë me 'të drejtën e çdokujt për arsimim')?!

Madje, a thua vallë shkollat tona, me theks të veçantë ato të mesme, i kanë punët aq në dyzen sa që e vetmja çështje e cila u ka mbet pa zgjidhur është qërimi i hesapeve me ndonjë nxënëse e cila është e mbuluar si rezultat i bindjes dhe dëshirës personale! Pse vallë, drejtorëve dhe arsimtarëve të këtij kalibri nuk u pengon veshja "allafranga" e disa nxënëseve që shkojnë në shkollë 'si nuse'?! Pse vallë këta pseudointelektualë "modernistë" nuk po merren me trajtimin e shumë anomalive destruktive të cilat janë prezente në shkollat tona të mesme, duke filluar nga rënia drastike e nivelit të mësimit, dhuna në mes nxënësve, amoraliteti i skajshëm, pornografia celulare, flirtet dhe 'dashuriçkat' në raportet mësimdhënës/e - nxënës/e dhe duke mbaruar me probleme të natyrës shkatërruese, siç është konsumimi i madh i duhanit si dhe alkoolit nga ana e nxënësve në moshë të mitur e deri te konsumimi i narkotikëve dhe psikosedativëve të ndryshëm?!

Një nga motivet tjera të veprimeve të këtilla non sens, me të cilin disa edhe mburren dhe rrahin gjoks, është pikërisht motivi i shfajësimit dhe gjetjes së 'fajtorit kujdestar', motiv ky i cili manifestohet në emër të "patriotizmit" dhe "ideve përparimtare", duke u thirrur në ato parullat e stërvjetëruara të "ideologëve" tanë të devalvuar, të cilët deri dje e mbanin të hipnotizuar popullatën shqiptare duke pretenduar se 'feja na ka lënë mbrapa'; 'mjaft më me shami e ferexhe'; 'femra shqiptare duhet emancipuar', 'duhet të shkojmë përpara dhe të hyjmë në Evropë', etj., e që koha, realiteti dhe faktet vërtetuan se shqiptarit nuk ia ka fajin askush, por është ai vet i cili ia bëri dhe vazhdon t'ia bëjë 'sherrin' vetvetes...

Zërat e këtillë arritën që në masë të madhe ta zhveshin femrën shqiptare, por bashkë me të u zhvesh edhe maska e demagogëve tanë të degjeneruar, politikanëve tanë të korruptuar si dhe intelektualëve tanë të harxhuar.

Kështu, kur erdhi koha që të mbrohen interesat e vërteta të këtij kombi, duke përfshirë themelimin e institucioneve të arsimit të lartë (siç ishte rasti me UT-në e dikurshme, USHT-në e sotme), ishin bijtë dhe bijat e këtij populli (shumë prej tyre vajza dhe gra të mbuluara, e pjesa më e madhe e tyre bij dhe bija të grave të mbuluara, të cilat për disa nga pseudointelektualët tanë konsiderohen "të prapambetura", duke harruar faktin se në mesin e atyre të "prapambeturave" është nëna, gjyshja apo ndonjë anëtar i familjes së tyre) ata të cilët dolën në mbrojtje të këtyre institucioneve, duke dhënë kontributin e tyre moral dhe material, bile duke derdhur edhe gjak, në kohën kur pseudo-intelektualët e llojit të lartpërmendur ishin 'ikajl' që të vëndonin shami e ferexhe për të pretenduar gjoja se janë gra, në kohën kur kërkoheshin burra!

Çifti i këtillë i njerëzve, në momentet kur u harxhohen 'bateritë' patriotike përkitazi me shumë çështje dhe se nuk gjejnë dot guxim apo mbulesë morale për t'i plasuar idetë e tyre të kalbura në tregun e popullatës shqiptare e cila shkon duke u vetëdijesuar, në këto momente ata tentojnë të kapen për flamurin e kaltër evropian, me shpresë se do t'u sigurojë mbulesë për turpin dhe bëmat e tyre, duke pretenduar se çdo gjë që thonë dhe bëjnë, e bëjnë në funksion të "evropeizimit" të shoqërisë shqiptare, duke pretenduar se "Evropa e civilizuar është gati të na pranojë në gjirin e saj, por pengesa e vetme është përkatësia fetare e kësaj popullate si dhe mënyra e veshjes së nënave dhe motrave tona"! Mirëpo, komunistët e dikurshëm, që sot hiqen si demokratë, harrojnë faktin se, në Evropën e sotme, njerëzit nuk shikohen me dioptrinë e skolastikës krishtere të mesjetës, por ajo që 'ha bukë dhe pi ujë' në tregun evropian janë vlerat e mirëfillta demokratike, funksionimi i shtetit të së drejtës si dhe respektimi i të drejtave dhe lirive themelore të njeriut. Madje, Evropa që moti i ka tejkaluar këto çështje parimore, dhe se në shtetet evropiane, vajza apo gruaja jo vetëm që ka të drejtë të shkojë në shkollë apo në punë me mbulesë, të del në fotografi (për dokumentet e identifikimit) me mbulesë, por tashmë në rrugët e disa shteteve evropiane do të hasësh edhe në police femra me mbulesë (siç është rasti me Anglinë), gjë që të jep të kuptosh se nuk është me rëndësi se si je i/e veshur dhe kush/çfarë je, por me rëndësi është funksionimi i ligjit dhe parimeve të së drejtës.

Por, pseudo-intelektualëve tanë mediokër, të cilët shumë pak dinë se kah shkon bota, e të cilët 'nuk shohin përtej hundës së tyre dhe 'po bëjnë ishsh aty ku nuk ka pula', siç thotë populli, duket se u është ndal ora diku në shekullin 20'të, kur shqiptarët ishin sharraxhinj, ndërsa pseudo-intelektualët ishin të respektuarit e popullit, raport ky i llojit 'Në mbretërinë e të verbërve respektohet edhe ai me një sy', siç do të thoshte Esad Mekuli, dhe harrojnë faktin se tashmë kjo popullatë e përvuajtur ka filluar të vetëdijesohet dhe të mësoje prej gabimeve dhe se nuk ulet më në vendin ku e ka kafshuar gjarpri disa herë me rradhë.

Argument më i mirë për vetëdijesimin e kësaj popullate janë reagimet e shpejta dhe konstruktive të të gjitha shtresave dhe institucioneve relevante si dhe ngritja e zërit të arsyes ndaj një skandali të këtillë.

Dhëntë Zoti që reagimet e këtilla konstruktive të jenë çdo herë prezente ndaj çdo padrejtësie dhe kurthi që orvatet ta përdhosë identitetin fetar dhe atë kombëtar të këtij populli, nga kushdo qoftë dhe kudo qoftë, e me theks të veçantë ndaj atyre të cilët e flasin të njëjtën gjuhë dhe thirren me të njëjtët emra!

Identiteti fetar, sikurse edhe ai kombëtar, tek të gjithë popujt e përparuar, paraqet vijë të kuqe dhe shenjtëri që nuk preket; madje, i tërë potenciali i çdo populli, në krye me elitën e saj intelektuale vëndohet në shërbim, kultivim dhe mbrojtje të këtij identiteti. Bile-bile, të shumtë janë ata popuj të cilët mundohen të krijojnë identitet të tyre fetar dhe kombëtar, sado artificial që është, marrë parasysh rëndësinë e tij në të kaluarën, të tashmen dhe të ardhmen e çdo populli.

Ndërsa, për fat të keq, një pjesë e shqiptarëve, këtë identitet të tyre, me gjitha ato vlera që i ngërthen në vete nocioni identitet kombëtar dhe fetar, kanë vendosur ta nëpërkëmbin dhe asgjësojnë, sa që, një pjesë bukur e madhe e elitës sonë intelektuale shqiptare (nëse ekziston) ia ka vënë për detyrë vetes që ta luftojë këtë identitet, e me theks të veçantë atë fetar, duke menduar se në këtë mënyrë do ta ngrejë vetveten dhe do të duket "më i qytetëruar" dhe "më evropian", duke harruar faktin se 'ai që del prej lëkurës së tij dhe tenton të merr një pamje tjetër është i gjykuar të dështojë, me ç'rast do të mbetet lakuriq, i zhveshur nga çdo lloj identiteti, ndaj edhe do të izolohet në vetvete', duke u braktisur prej çdokujt, pasi, 'një njeri që e injoron vetveten, ai nuk mund të dojë askënd tjetër'!

Është ky paradoks i hidhur i llojit të vet alla-shqiptarçe, i shndërruar në ndjenjë të inferioritetit dhe urrejtjes së skajshme, me përmasa të vetëshkatërrimit, si dhe një grupi të njerëzve të cilët 'paradite e urrejnë vetveten, ndërsa pasdite fillojnë ta urrejnë gjithë botën'.

Ruana Zot beterit!

shko lart