El-Hikmeh

Në Bernë themelohet Këshilli i Religjioneve
(Një moment historik drejt rrugës për dialog dhe paqe ndërfetare)

Komunikatë për shtyp
15 maj 2006, Bernë; www.sek-feps.ch

Pas një viti e gjysmë përgatitje, sot është themeluar Këshilli i Religjioneve. Në Këshill marrin pjesë përfaqësues më të lartë të kishave të vendit, të jehudive dhe të muslimanëve. Në Bernë me një akt festiv ata nënshkruan mandatin e përpunuar bashkë. Këshilli i religjioneve do të shërbejë si një platformë dialogu ndërmjet përgjegjësve të bashkësive fetare si dhe si një partner dialogu për institucionet shtetërore.

Një risi dhe një moment historik

Themelimi i Këshillit Zviceran të Religjioneve (Swiss Council of Religions: SCR) paraqet një risi si dhe një moment historik. Për Zvicrën ky Këshill është një risi si për nga përbërja ashtu dhe për nga qëllimi i tij: personat e zgjedhur nga komitetet e tyre, nga udhëheqësit e kishave dhe të bashkësive fetare, do të takohen në mënyrë të rregullt për shkëmbim të anasjelltë. Themelimi i SCR është një moment historik, sepse ai në nivelin nacional ka karakter shembulli për procesin e mirëkuptimit dhe dialogut ndërmjet kishave dhe bashkësive fetare.

Harta e re fetare

Harta fetare e Zvicrës dhe funksioni i kishave dhe bashkësive fetare në shoqëri janë ndryshuar shumë. Vetëm para 30 vitesh mbi 90% e zviceranëve i takonin njërës prej tri kishave krishtere në vend. Kjo pamje është ndërruar gjatë globalizimit dhe lëvizjeve të mërgimtarëve gjithkund nëpër botë. Zvicra është shndërruar në një hapësirë ku bashkëjetojnë njerëz nga kultura, tradita dhe sisteme të ndryshme vlerash, një sfidë e përbashkët për solidaritetin shoqëror dhe bashkëjetesën paqësore.

Qëllimet dhe mandati

Me krijimin e Këshillit Zviceran të Religjioneve, kishat dhe bashkësitë fetare që marrin pjesë në të, bashkohen rreth këtyre qëllimeve:
- Kontributi për ruajtjen dhe përkrahjen e paqes ndërfetare në Zvicër,
- Marrëveshja ndërmjet pjesëmarrësve për dëshirat e përbashkëta,
- Krijimi i mirëbesimit ndërmjet bashkësive fetare,
- Dialogu për çështjet aktuale fetare-politike,
- Mundësia për t’u referuar autoritetet lidhur me këto çështje.

Përbërja dhe historiku

SCR përbëhet nga persona udhëheqës të tri kishave të vendit dhe të bashkësisë jehudite si dhe organizatave muslimane, të cilët janë të autorizuar nga institucionet apo organizatat e tyre. Iniciator dhe udhëheqës i parë i SCR do të jetë prifti Thomas Wipf, president i Këshillit të Federatës së Kishave Protestante në Zvicër (SEK). Wipf ka vënë në dukje idenë e themelimit të një Këshilli të religjioneve. Një mbrëmje para luftës së Irakut, para 3 vitesh, me iniciativë të SEK-ut në Münster të Bernës për herë të parë u mbajt një festë e paqes me përfaqësues të të tria religjioneve monoteiste: Judaizmit, Krishterimit dhe Islamit. Nga kjo lindi ideja për krijimin e një vendtakimi dhe kuvendimi të rregullt – e gjitha në shenjë të përgjegjësisë së përbashkët të kishave të vendit dhe bashkësive fetare për ruajtjen dhe përkrahjen e paqes ndërfetare në Zvicër.

Pikëpamjet e pjesëmarrësve

“Me SCR-në autoriteteve të vendit tonë tani u është dhënë një bashkëbisedues reprezentativ, i cili çdo çështje fetare të rregullit të përgjithshëm do ta trajtojë në mënyrë kompetente”, theksoi Alfred Donath (SIG) në mbledhjen e themelimit. ”Ato mund të llogarisin në një komitet, i cili për qëllim ka mbrojtjen dhe nxitjen e paqes ndërfetare në Zvicër, që çdo burrë dhe grua, pavarësisht nga bindjet e tyre, të ndihen mirë këtu dhe, nëse dëshirojnë, ta jetojnë diferencën e vet, mirëpo brenda kufijve të kujdesit të të tjerëve, të tjetrit.”

“Popullit tonë i duhet kohë për t’i njohur fetë që nuk janë të rrënjosura tradicionalisht në vendin tonë”, shtoi nga ana e tij Fritz-René Müller (Christkatholische Kirche der Schweiz). Hisham Maizar (FIDS) ishte i mendimit se “muslimanët dëshirojnë që, si pjesë e shoqërisë që janë, të merren si në detyrime ashtu edhe në përgjegjësi, për të bashkëpunuar në mënyre konstruktive dhe efektive mbi bazat e dialogut, nderimit të vlerave njerëzore dhe respektit të ndërsjellë në sigurimin e paqes ndërfetare.”

Për peshkopin Kurt Koch (SBK), SCR është gjithashtu edhe një pohim publik për atë ”që religjioni është një dëshirë shumë personale e secilit njeri, dhe mu për këtë arsye nuk guxon të depërtohet në sferën private: feja është gjë personale, mirëpo jo private. Ajo gjithashtu nuk është gjë shtetërore, mirëpo publike”. “Rëndësia morale e Këshillit të Religjioneve, kështu theksoi bindshëm Farhad Afshar (KIOS), tregon më tepër sesa mundësitë faktike të punës së tij”... ”Rezultati më i rëndësishëm i themelimit të Këshillit është krijimi i besimit ndërmjet bashkësive fetare”.

__________________________________

Këshilli Zviceran i Religjioneve

Anëtarët:

- Prifti Thomas Wipf, kryetar i Këshillit të Federatës së Kishave Protestante në Zvicër (SEK), udhëheqësi i pare i SCR
- Peshkopi Dr. Kurt Koch, Zëvendëkryetar dhe përfaqësues ekumenik i Konferencës Zvicerane të Peshkopëve (SBK)
- Peshkopi Fritz-René Müller, Kisha Krishtkatolike e Zvicrës
- Prof. Dr. Alfred Donath, kryetar i Federatës Izraelite të Zvicrës (SIG)
- Doc. Dr. Farhad Afshar, kryetar i Koordinacionit të Organizatave Islame në Zvicër (KIOS)
- Dr. Hisham Maizar, kryetar i Federatës së Organizatave Islame në Zvicër (FIDS)



Nga gjermanishtja: Lejla Medii