EL - HIKMEH

Margaritarë të urtësisë

HARUN ER-RASHIDI DHE BEHLUL DANA

Njëherë duke u kthyer nga haxhi, Harun er-Rashidi qëndroi disa ditë në Kuffe. Kur doli me një rast e takoi Behlulin (në shikim të parë person i hutuar) i cili filloi me zë të lartë ta thërrasë: “Harun, Harun!”.

Harun er-Rashidi pyeti se kush po e thërret dhe kur i thanë që ishte Behluli, urdhëroi ta ngritë perden (ngase njerëzve u fliste pas perdes) dhe e pyeti:

“A më njeh mua?” - pyeti Harun er-Rashidi.

“Po” - tha Behluli.

“E kush jam unë?” - pyeti Harun er-Rashidi.

Behluli iu përgjigj: “Ti je ai që do të përgjigjesh para Allahut, nëse gjendesh në Lindje, e dikujt i bëhet zullum në Perëndim, Allahu do të pyet çfarë ke ndërmarrë!” Haruni e uli kokën dhe qau.

Haruni përsëri e pyeti si e sheh gjendjen e tij, ndërsa Behluli u përgjigj: “Peshoje veten tënde sipas Kur’anit dhe do ta kuptosh” - dhe citoi versetin:

“E s'ka dyshim se të mirët janë në kënaqësinë e përjetimeve (në xhennet). Dhe se mëkatarët janë në xhehennem.” (El - Infitar, 13-14)

Haruni e pyeti përsëri: “Por, veprat tona?!”

Behluli u përgjigj me versetin:

“... All-llahu pranon vetëm prej të sinqertëve.” (El - Maide, 27)

Haruni pyeti: “Por lidhja jonë familjare me Pejgamberin a.s.?”

Behluli u përgjigj me versetin:

“E kur i fryhet surit (herën e dytë), atëherë, në atë ditë nuk do të ketë lidhje familjare mes tyre e as që do të pyesë kush për njëri-tjetrin.” (El - Mu’minun, 101)

Haruni pyeti: “E çfarë është me shefa’atin (ndërmjetësimin) e Pejgamberit s.a.v.s. për ne?!”

Behluli u përgjigj me versetin:

“Atë ditë nuk bën dobi as ndërmjetësimi, përveç atij të cilin e ka lejuar i Gjithëmëshirshmi...” (Ta Ha, 109)

Haruni e pyeti: A të nevojitet diç?”

Behluli u përgjigj: “Po, kam nevojë, a mundesh të m’i falësh mëkatet dhe të më fusësh në xhennet?”

Haruni u përgjigj: “Unë këtë nuk mundem, por kam dëgjuar se ke borxh, andaj mund ta lajë borxhin tënd?”

Behluli u përgjigj: “Borxhi nuk lahet me borxh, por ti ktheja borxhin popullit tënd!”

Haruni përsëri e pyeti Behlulin t’i përcaktojë ndihmë deri në vdekje, ndërsa ai u përgjigj: “Ti dhe unë jemi vetëm rob të Allahut, a thua mendon që Allahu do të përkujtojë ty, e mua më harron? Më i kënaqur jam me atë që është te Allahu, sesa me atë që është në dorën tënde kalimtare.”

Haruni ngriti kokën dhe i mbajti në mend mirë këshillat e Behlulit.

Përktheu dhe përshtati:
Prim.dr.med.sc. Ali F. Iljazi